Is-seduti ta' smigħ ta' konferma għall-Kummissjoni Ewropea

Il-Parlament Ewropew jistieden lill-Kummissarji nnominati biex jidhru quddiem il-kumitati xierqa għal seduti ta’ smigħ ta’ konferma sabiex jaraw jekk humiex adatti għall-karigi li ġew assenjati lilhom.

Waqt is-seduti ta' smigħ ta' konferma, il-Membri tal-Parlament Ewropew se jfittxu li jivvalutaw jekk il-Kummissarji nnominati għandhomx l-indipendenza, il-kompetenzi u l-impenn Ewropew biex jservu bħala membri tal-Kummissjoni Ewropea l-ġdida.

Qabel is-seduti ta’ smigħ, il-kumitat għall-affarijiet legali tal-Parlament jeżamina d-dikjarazzjonijiet ta’ interess tal-kandidati biex jeskludi kwalunkwe kunflitt ta’ interess ta’ natura finanzjarja, li huwa prekundizzjoni biex titwettaq is-seduta ta’ smigħ ta’ kandidat partikolari. Il-kandidati jridu jwieġbu wkoll mistoqsijiet bil-miktub imħejjija mill-kumitati parlamentari.

Il-curriculum vitae tal-Kummissarji nnominati, ir-riferenzi għall-pożizzjonijiet tagħhom u t-tweġiba tagħhom għall-mistoqsijiet bil-miktub jiġu ppubblikati fuq is-sit web tal-Parlament qabel ma ssir kull seduta ta’ smigħ ta’ konferma.

Waqt is-seduti ta’ smigħ ta’ konferma, li jixxandru b’mod dirett, il-Kummissarji nnominati jippreżentaw il-programmi tagħhom u jwieġbu għall-mistoqsijiet orali mressqa mill-MEPs.

Wara s-seduti ta’ smigħ, il-presidenti tal-kumitati u r-rappreżentanti tal-gruppi politiċi jivvalutaw il-kandidati u jħejju l-ittri ta’ evalwazzjoni tagħhom. Il-Kummissarji nnominati jistgħu jintalbu jwieġbu aktar mistoqsijiet bil-miktub jew jiġu mistiedna għal seduta ta’ smigħ mill-ġdid.

Kummissarju nnominat li ma jkollux suċċess jista’ jiġi rtirat mill-Istat Membru tiegħu u sostitwit minn kandidat ġdid bi qbil mal-President tal-Kummissjoni. Il-kandidat il-ġdid jeħtieġlu jgħaddi wkoll mill-passi preparatorji kollha u minn seduta ta’ smigħ ta’ konferma fil-Parlament.

Fi tmiem il-proċess, l-ittri ta’ evalwazzjoni tal-kumitati jiġu eżaminati mill-Konferenza tal-Presidenti tal-Kumitati u jintbagħtu lill-Konferenza tal-Presidenti, li huwa korp magħmul mill-President u mill-mexxejja tal-gruppi politiċi tal-Parlament, li jistgħu jitolbu aktar informazzjoni jew jiddikjaraw is-seduti ta’ smigħ ta’ konferma magħluqa.

Ladarba jingħalqu s-seduti ta’ smigħ ta’ konferma, il-President tal-Kummissjoni jiġi mistieden jippreżenta l-Kulleġġ tal-Kummissarji nnominati u l-programm tiegħu matul dibattitu fil-plenarja, u wara dan il-Parlament Ewropew jivvota dwar il-Kulleġġ tal-Kummissarji fis-sħuħija tiegħu.

Ara l-programm sħiħ għas-seduti ta' smigħ ta' konferma tal-Kummissarji nnominati:
– Verżjoni HTML
– Verżjoni PDF (bl-Ingliż biss)